Septarien bildumako truke-programa aurrera doa
2023-10-02
Euskal Kostaldeko Geoparkeak kudeatzen duen septarien bildumaren elkartruke-programarekin jarraituz, azken egunetan bi pieza gehiago eskuratu dira. Bata Karrantzatik dator (Enkarterriak, Bizkaia) eta bestea, berriz, Zubielkitik (Lizarraldea, Nafarroa).
Debako Udalak septarien bilduma bat bereganatu zuen joan den udaberrian, ondare geologiko eta kaltebera den hau berreskuratzeko eta jendaurren jartzeko asmoarekin. Bilduma horren zati txiki bat truke-programa baterako bideratu da ordutik, Geoparkearen kudeaketari esker. Bertako septariekin zein kanpotik ekarritakoekin erakusketa iraunkorra osatzea da helburuetako bat. Aldi berean, Debako hondartzako flysch beltzean aurkitutako septaria baliotsuak nazioartean ikusteko aukera ematen du elkartruke-programak. Honenbestez, ondare geologiko baliotsu hau berreskuratzeko eta babesteko aukera aparta da septarien bilduma hau, izan ere, mineralen salerosketaren eta bitxien merkatuaren interesaren mendean egotetik libre uzten baita horrela.
Septariak kanpo-morfologia esferikoko noduluak dira, barne- haustura erradialen eta/edo zentrokideen sare bitxia garatzen dutenak, ertz angelutsuekin eta punta zorrotzetan bukatuta. Debako iparraldeko septariak oso ezagunak dira mineralogian eta mineralen han-hemengo bildumagileek asko estimatzen dituzte euren edertasunagatik eta haustura dotoreengatik. Debako septaria beltzak batez ere kaltzitaz beteta daude eta, unean-unean, baritinaz eta piritaz. Albiar Flysch Beltzean dagoen beta zehatz batekoak dira.
