Geoparkeak basoko onddoak ezagutzeko irteera egingo du Itziarren, azaroaren 19an
2023-11-10
Lizarreta mendiaren inguruan egingo da irteera mikologikoa, biodibertsitatea sustatzeko BIOTOP ekimenaren baitan
Euskal Kostaldeko Geoparkeak BIOTOP izeneko biodibertsitate topaketa antolatu du Aranzadi Zientzia Elkartearen laguntzarekin datorren iganderako, hilaren 19rako. Mikologian lehen urratsak emateko aukera paregabea izango da hasiberrientzat. Itziarko plazatik abiatuko da ibilbidea eta goizeko 10:00etan hasi eta 13:00ak arte iraungo du jarduerak.
BIOTOP topaketa doakoa eta irekia izaten da, hau da, edonori dago zuzendua. Geoparkeko biodibertsitatea ezagutzera ematea du xede eta, horretarako, Aranzadiko adituen parte-hartzea izaten du urtero. Udazkeneko edizio hau Itziarko Lizarreta mendiaren bueltan egingo da eta inguruan ditugun onddoak bertatik bertara ezagutzea da irteeraren helburua.
Ekimena gaztelaniaz egingo da eta tokia mugatua izango da. Parte hartzeko izena eman behar da formulario honetan: labur.eus/onddoak2023. Animatu zaitez!
